"طلة شمس" بقلم الأستاذ خالد صادق
الله يصبحك بالخير يا أبو جابر, بشر ايش أخبار القمة العربية, انشالله يكونوا العرب اتفقوا على اشي هذه المرة.
والله اتفقوا يا أم جابر, لأول مرة العرب يتفقوا على تشكيل قوة عسكرية عربية لمواجهة الأخطار اللي بتهدد الأمة العربية.
يعني العرب بدهم يحاربوا إسرائيل يا أبو جابر, الله يبشرك بالخير على هالخبرية الحلوة عالصبح, ايوه كده والله الواحد ما صدق الناس تفوق وتعرف عدوها, أي والله لعملك أحلى كاسة شاي على هالخبرية.
اححح ححح .. واللله المسألة يعني مش هيك, مش زي ما انتي فاهمة يا أم جابر, أصل المسألة يعني.
مالك بتتنحنح يا أبو جابر, هو انا فهت غلط وللا ايش, طيب قول انت ايش الصح, وبلاش كاسة الشاي هالوقت لما نشوف اخريتها معك.
بصراحة يا أم جابر القوة العسكرية العربية المشتركة مش إلنا, يعني مش للقضية الفلسطينية ولا للقدس والأقصى, وللا للتصدي لإسرائيل ومخططاتها, مهوا الصحيح صحيح يعني, وانا بحكيلك بصراحة, مششش ااالنا.
ها لمين يا فالح لمين هااا, بطلنا نشربك شاي, ماش انت بتقول انه هذه القوة العربية اللي مش عارف ايش وايش, مهمتها مواجهة الاخطار اللي بتهدد الأمة العربية, وايش في أخطار بتهدد الأمة أكثر من خطر إسرائيل هاااا.
اسكتي يا أم جابر, ماش إحنا طلعنا غلطانين, وطلع فيه خطر اكبر من إسرائيل بهدد الأمة العربية, وبيلعن أبو سنسفيلها, وبيجيبها الأرض.
يا لطيف يا أبو جابر .. وايش هالخطر يا زوجي العزيز اللي بهددنا أكثر من إسرائيل, اوعى تقول لي الشيطان الله يلعنه, لأنه الشيطان زي مبيتلبسنا بيتلبسهم, وإسرائيل شيطان الإنس والجن.
لااا يا أم جابر انتي مش فاهمه, في اخطر من هيك, في شيطان اسمه "الإرهاب" بدها الدول العربية تحاصره وتحاربه وتقضي عليه, الإرهاب اخطر من إسرائيل ومن كل الشياطين الارهاااب يا أم جابر.
يا راااجل هو ايش الإرهاب, مهيا إسرائيل منبع الإرهاب في العالم, هيا الإرهاب نفسه, انت ما شفت الانتخابات الإسرائيلية, نجحت كل رموز الإرهاب في إسرائيل, يا راجل المجتمع الإسرائيلي كله مجتمع إرهابي, هو ايش مفهوم الإرهاب صار عند العرب, يعني حماس إرهابية والجهاد إرهابي, والمقاومة إرهاب, يا ناس ارحمونا بلاااش تهريج.
أنا مالي يا أم جابر, والله أنا ما حكيت انه المقاومة إرهاب, هما اللي بيقولوا هيك, بعدين خافي على حالك بلاش ضغطك يرتفع وتروحي فيها, ليقولوا أبو جابر قتل مرته.
يا ريت نموت, بيكون أحسن والله وعشنا للوقت اللي يكون إلنا جيش عربي مشترك مفيش على اجندته محاربة إسرائيل, هيا الدنيا آخر زمن وللا ايش.
يا أم جابر الله يرضى عليكي, يعني انتي مش عارفه الحكام العرب تعونا, بيخافوا من إسرائيل, وما بدهم يحاربوها, بيخافوا على عروشهم وكراسيهم, المشكلة انه الهزيمة صارت معششه في روسهم, علشان هيك عمرهم ما بيرفعوا روسهم.
طيب بلاش يا أبو جابر يعقدوا قمم عربية, طالما مش قادرين يتخذوا أي قرارات ضد إسرائيل, وللا هما حبين يعكننوا علينا وبس, الله يغتيهم زي ما بيغتونا.
هما بيعقدوا هذه القمم علشان يحافظوا على عروشهم, ويبينوا قدام شعوبهم إنهم متوحدين ومتوافقين في مواقفهم السياسية, بس الحقيقة إنهم غير هيك, وبيتوحدوا بس لما يحسوا انه في أخطار تواجههم, وقبل ما يقعدوا يتناقشوا بيكونوا محددين البيان الختامي والقرارات اللي راح يخرجوا بها, يعني الطبخة مطبوخة من الأول, واللي بيتقبلها بياكل منها, واللي ما بيتقبلها بيسيبها.
يله خلي إسرائيل تفرح فينا, وتعمل اللي بدها إياه, يا بختها في حكامنا العرب, كل يوم بيصنعوا الهم عدو جديد غير إسرائيل, عدو بيفصلوه تفصيل على مقاسهم, وبيحطوه على قوائم الإرهاب, الله يضيعهم زي ما ضيعونا, والله الواحد بده ينقهر من هالظلم.
يا وليه .. يا وليه خافي على صحتك, انتي يعني اللي بدك تصلحي الكون, الحيطان إلها ودان, انتي عندك الضغط والسكري, ومش حمل بهدلة, لتروحي فيها بعدين يقولوا إن أبو جابر قتل مراته.
