طلة شمس / خالد صادق 

* الصبح شقشق والشمس عدها بكت, قومي يا ام محمد خلينا نلحق هالحصيدة من أول النهار الولد بستنانا 

* طول بالك شوي يا أبو محمد, قاعده بحضر في الزوادة إلنا ولحبايبنا اللي بيساعدونا وللعمال عدي خلصت 

* يا أبو محمد , يا أبو محمد افتح الباب بسرعة , النار أكلت الحصيدة افتح يا أبو محمد 

* مين هذا اللي جاي يصرخ عالصبح .. مين أنت يا راجل .. ونار ايش وحصيدة ايش 

* يعني مش عارف هذا صوت مين يا أبو محمد, هذا صوت جارنا أبو حسن, قوم افتح يا راجل ايش بتستنا 

* تفضل يا أبو حسن , تفضل ما تواخذني ما عرفت صوتك, كنك مصروع ومفجوع يا خوي, خير كفا الله الشر 

* وين اتفضل انت تعال معي بسرعة خلينا انطقي النار 

* نار ايش كفا الله الشر يا أبو حسن .. يكفيك شرها يا خوي .. يكفيك شرها 

* الملاعين المستوطنين والجيش شعللوا النار في زرعك, والقمح كله مولع, مش قادرين نطفيه ونسيطر عالحريق, الريح مساعدة على انتشار النار بشكل سريع في القمح . 

* له يا أبو حسن, له له له .. ايش بتقول ابني محمد قاعد هناك بيحرس الزرع وما ساب الأرض ولا لحظة . 

* المستوطنين والجنود الملاعين هجموا عليه فجأة, وهددوه بالسلاح وقيدوه, وعملوا عملتهم وهربوا .. الله يخدهم ويريحنا منهم, مفش حدا قادر يوقفهم عند حدهم هدول الملاعين, الله عليهم, قادر يخلصنا منهم. 

* وهو كيف يا أبو حسن, كيف ابني محمد طمني عليه الله يطمنك, وصدقني القول يا خوي. 

* بخير يا أبو محمد, والله انه بخير, اطمن يخوي اطمن, قاعد بيطفي في النار مع الناس 

* انت لساتك بتسأل يا أبو محمد .. قوم اجري شوف أرضك وزرعك, وشوف ابنك ايش حصل فيها 

* والله ما عاد فيا حيل للجري يا أم محمد, الواحد ركبه سابت ومش قادر يقف على حيله من اللي بيسمعوا 

* قوم يا أبو محمد .. قوم الله يعوضنا عوض خير .. في المال ولا في العيال يا خوي, في المال ولا في العيال 

* الله اكبر ايش هذا النار منتشرة في الأرض كلها يا أبو حسن, هذاك محمد في وسط النار, نادي عليه يا أبو حسن, نادي عليه بلاش تحرقه النار, قول له ابوك بيقولك اطلع, يا ولد يا محمد اطلع من وسط النار يا بوي اطلع الله يرضى عليك, الله يعوضنا عوض خير, اطلع يابا النار مشعلله ومش راح نسيطر عليها. 

* خليك بعيد يابا أنا راح اطفيها, الملاعين قيدوني, وهددوني بالسلاح, مقلتلك يابا نشتريلنا سلحة وندافع عن نفسنا وأرضنا, أنت اللي ما رضيت, الله يسامحك يابا, كل تعبنا طول السنة راح على ايد الملاعين . 

* اطلع يابا من وسط النار اطلع, ما تزعل مني راح اجيبلك بارودة تدافع فيها عن أرضك, تعال يابا تعال خلنا نتفاهم, هما بيفكروا انّا راح نسيبها الهم علشان يحولها لمستوطنة, فشروا والله ما نسيبها لو على جثثنا, راح نزرعها تاني ونحرسها ونسيجها بدمنا, هذه ارضنا وعرضنا, وما بنفرط فيها أبدا. 

* ما توخذني يابا أنا عليت صوتي, بس والله من القهر يابا, والله إني ناطحتهم وقبل ما يقيدوني ضربت اثنين منهم وقعتهم عالارض, ولما بركت فوقه واحد منهم ضربوني لجنود بكعب البارودة على راسي وما صحيت على حالي إلا وأنا مقيد, ومرمي عالارض والنار من حواليه, والشباب صحابي شافوا النار اجو جري وفكوني وطلعوني من وسط النار. 

* طول عمرك راجل يابا, فداك الزرع المهم انك بخير, وطول محنا عايشين عوجه الأرض, راح نضل نزرع أرضنا ونحرسها ونفديها بأرواحنا, إحنا وهما والزمن طوووويل, ويوم اليك ويوم عليك, واللي اليك اليك, واللي عليك عليك يابا, والأيام بينا, والشاطر اللي يضحك في الآخر, اليوم قهرونا, بكرة بنقهرهم, قوم على حيلك خلينا نظف الأرض ونزرعها من بكرة من جديد. 

* وحنا معاك يا أبو محمد, وإحنا معاك يا محمد, أيدنا في ايديكم, والضربة اللي ما بتموتنا بتقوينا. 

* عاشوا الرجال عاشوا ... قولوا الله يا رجال.