طلة شمس .. خالد صادق

· قوم يمه يا صلاح الله يرضى عليك روح شوف ايش صار في "الشمينتو" بدهم يسلمونا إياه وللا لأ, بلكي نرمم البيت ونقعد فيه بدل ما إحنا مشحططين في المدارس وهنا وهناك.

· يمه الله يرضى عليكي سبيني نايم بلاش نكد عالصبح, انتي عارفة كل يوم بنروح نسأل وبنرجع مش فاهمين حاجة, مرة بقولوا لسة ما اجاكم الدور, ومرة بيقولوا ما في اسمنت, ومرة بيقولوا مش احنا المسؤولين عن التوزيع, دوخونا يمه عالفاضي, يبدو انه حالنا عجبهم هيك, وما بدهم يحلوا مشاكلنا.

·معلش يمه بدنا نصبر, مهو إحنا المحتاجين, وفي المثل بيقولوا إذا كان لك عند الكلب حاجة قوله يا سيدي, اعصر على حالك لمونة وروح تاني اسأل يمكن يكون فيه جديد, الوزير بيقول الحل جاي جاي, بقصد معالي الوزير لحسن حد يكون سامعنا ويزعل, الحيطان الها ودان.

·أي وزير يمه انتي بتصدقيهم, هدول بيتاجروا بمعاناتنا, وبينهبوا فلوس الاعمار, هما من ناحية والأونروا من ناحية تانية, بدهم يتبغددوا على حسابنا, حسبي الله ونعم الوكيل.

·هسسس وطي صوتك يمه يا صلاح, بلاش حدا يسمعك, بقلك الوزير قال الوضع راح يتحسن, والأسبوع الجاي راح تدخل مواد الاعمار كلها على غزة, خلينا نحجز دور, وللا انت عاجبك نومتنا في المدارس, مش مكفي الله لا يكسبهم قطعوا عنا التموين, وحرمونا من المعونات, قال ليش علشان إحنا قاعدين في المدارس, طيب وين نروح انشالله, يعني هو انتو وفرتوا النا أماكن إيواء وما رحنا, قال ايش لزك عالمر, قال اللي أمر منه, أي والله البرد والصقعة  قتلونا.

·انهو وزير يمه هذا اللي قال راح تدخل مواد الاعمار, هو بيحكم على حاجة, بس يحكم على ....

·له يمه يا صلاح من وقتيش صرت تقول هالالفاظ,ايش بكرة يقولوا عنا ترباية مدارس مشردين, والله ما أنا عارفة ايش اسمه الوزير, هيهم كلهم وزرا , الناس كلها إلها وزير واحد, إحنا إلنا اتنين, والهم حكومة إحنا إلنا حكومتين, والناس كلها إلها رئيس وزرا, إحنا النا اتنين, والناس كلها إلها رئيس, عقبال ما يصير إلنا رئيسين قول يااااا رب.  

·له يمه ليش هالدعوة عالصبح, إحنا ما صدقنا وتصالحنا وصار إلنا حكومة وحدة مش حكومتين, ووزير مش وزيرين, ورئيس وزرا مش رئيسين, تفي من بقك يمه .. تفي.

·هو إحنا اتصالحنا يمه يا صلاح, وقتيش .. أي والله نفسي اوررر زغرودة, بس أنا بشوفهم عالتلفزيون وبسمعهم عالراديو لسة بسبوا على بعض, وبيتهموا بعضهم اتهامات خطيرة, وللا هيا السياسة هيك, اللي في قلبك مش زى اللي عالسانك, يعني الجماعة قلوبهم بيضة وصافية وبريئة, انشالله بس إلنا خاطر يتفقوا على اعمار البيوت المهدمة, والله ما النا ذنب في الخلافات اللي بينهم, ايش ذنبنا بس في كل اللي بيحصل.

·انتي مش فاهمة يمه, أصلة الاعمار دخل في السياسة, والسياسة دخلت في الاعمار,  ومش همه بس اللي بيتحكموا في الاعمار, صار في ناس كثير لازم يرضوا عن الاعمار علشان يبدأ, إسرائيل, والأمم المتحدة اللي وضعت خطة سيري, والاونروا, وفي دول عربية ما بدها تدخل مواد الاعمار من معابرها, ودول عربية تانية ما بدها تدفع أموال الاعمار إلا بشروطها, المسألة مش فتح وحماس بس, وللا حكومة غزة ورام الله, المسألة اكبر من هيك بكثير, كلهم بدهم يستفيدوا, افهمي يمه, افهمي. 

·ايش افهم يمه.. ايش افهم, كل هدول يمه يا صلاح لازم يوافقوا عالاعمار قبل من يبدأ, وكيف بدنا نرضيهم ونخليهم يوافقوا, أي والله بدنا عشر سنين لما نقنعهم إنهم يسمحولنا باعمار بيوتنا, أقلك يمه, الله يسد نفسك على الصبح,  ارجع نام تاني احسن لك, وخلينا نستنى الفرج من الله, هو اللي شايف واللي عارف بأحوالنا. 

·ماش قلتلك يمه خليني نايم مسمعتيش كلامي, هيك عرفتي, بس أنا مش عارف كيف راح يجيني نوم تاني بعد ما نكدنا على حالنا, عالعموم خلي المدارس ضبانا, احسن ما نتشرد في الشوارع وتصير أحوالنا خربانة, قومي يمه نامي تحت الطاولة هديك اللي في القرنة, ادفالك من هذا المكان.

·لا يا سيدي هيني سيبالك الصف كله اشبع فيه, أنا بدي أروح عالفسحة واقف دور عالحمام قبل الزحمة.

·بالله يمه الله يرضى عليكي تقولي لصاحبي حسن يحجزلي دور على حمامات الرجال على ما أقوم من النوم, وإذا لقتيه لسه نايم صحيه من النوم, علشان عنده صبر وطولة بال على طوابير الحمامات مش زيي خلقي ضيق وبقاتل دبان وجهي.