Menu
اعلان اعلى الهيدر

خالد صادق

خبر: طلة شمس .. اتصالحوا يا عالم . اتصالحوووه!

خالد صادق

يصبحك بالخير يا عم ابو وفيق, اسمعت الاخبار اليوم .. بيقولوا موسى ابو مرزوق وصل غزة علشان المصالحة, والله باين عليهم جادين هالمرة  وبدهم يتصالحوا, انت عارف ايش يعني ابو مرزوق يا عم ابو وفيق, يعني الرجل التاني في حماس بعد مشعل, انشالله هالمرة راح نحل مشاكلنا ونتصالح وللا ايش رايك انت.  

أي هيا فيها راي, لازم يتصالحوا يا فايز, كل اشي بيصير حوالينا بيقول الهم اتصالحوا, معبر رفح المسكر, والحصار الخانق, واللي بيحصل في الاقصى من اقتحامات يومية على  ايدين الملاعين اليهود, والمستوطنات اللي بتتوسع, والقصف اللي فوق روسنا كل يوم, هذا كله بيقول الهم اتصالحوا يا عالم, وفكونا من هالانقسام.

بس والله يا عم ابو وفيق انا خايف ... انت مش سامع اللي بيحكوه على بعضهم في وسايل الاعلام, اللي طالع يهدد انه هذه اخر فرصة للمصالحة, وانه بعد هيك بده يحل المجلس التشريعي ويتوجه للانتخابات, والتاني طالع يرد عليه ويقوله احنا اللي بنحلك وبنشيلك من السلطة,  وانتخاباتك لا بتقدم ولا بتأخر, وواحد تاني "ملعون والدين" طالع يدين عملية الخليل ويساوي دمنا بدم اليهود المستوطنين, بيرد عليه الثاني بسبه وبيسب الرئيس اللي عينه, كيف بدها تصير المصالحة يا ابو وفيق وهما بيسبوا على بعضهم.   

يا فايز يا خويا دهاليز السياسة كثيرة, وبيرها سحيق, اللي بتسمعه في وسايل الاعلام احيانا ما بيكون له علاقة بللي بيصير واللي احنا شايفينه, طالما انه ابو مرزوق اجا, بيكون فيه اشي, خاصة انه اخوانا المصريين هما اللي بعتوه, خليك متفائل يا فايز, انت دايما غاوي نكد.

لا والله يا عم ابو وفيق, لا غاوي نكد ولا حاجة, بس الواحد بيعمل حساب لكل اشي, علشان بكره ما يتفاجأ لو لا سمح الله .. لا سمح الله يعني المصالحة ما تمت الشر بره وبعيد, اصله الواحد تعب وهو بيستنى انه المصالحة تتم, ويخلص من عار الانقسام وتبعاته, انت ناسي يا عم ابو وفيق انه قبل هيك اتفقنا على المصالحة في مكة, وقرينا الفاتحة في الكعبة, وبعدين جددنا المصالحة  في الدوحة, والمرة الثالثة في القاهرة بصمنا عليها بالعشرة, ووزعنا الحلو في الشوارع, وطبلنا وزمرنا, ومن يومها يا راجل يا طيب واحنا بنستنى ان المصالحة تتطبق, بس زي ما انت شايف, من مصالحة لمصالحة وعالارض ما في اشي, هي اللي مخوفني يا عم ابو وفيق, انت فاهمني .. وانشالله ربنا يخيب ظني ويتمموا المصالحة على خير يا عمي.

انشالله عمى الدبب يا فايز .. احكيلك كلمة طيبة يا بتنقطنا بسكاتك, هذه المرة اتفائل يا فايز, وما تخلي الفار يلعب في عبي, لحسن افقعك بهالسكين في عينك, اصلك انت زي الغراب فالك شين, يعني انت لازم تفكرنا بمصالحة مكة والدوحة والقاهرة هالوقت, خلي الواحد صباحه منيح يا راجل, وما تعكر مزاجنا, وللا انت غاوي نكد, بس انا بقولك وخليها حلقة في ودنك هالمرة بجد في مصالحة, وبكره بتشوف.

أي والله انا يا عم ابو وفيق متلهف عالمصالحة اكثر منك, ونفسي تصير اليوم قبل يكره, يعني هو احنا مبسوطين من هالحال, الاخوة في البيت الواحد منقسمين هذا فتح وهذا حماس, واسرائيل مبسوطه على هيك, لأنها هيا المستفيده من الانقسام, مش بس هيك وكمان بتغذيه وبتدعمه وبتشعللها نار بينا, وبتحاول تمنع المصالحة بأي شكل من الاشكال, مرة بتهدد بوقف المفاوضات لو تمت المصالحة, ومرة بتهدد بوقف الدعم المالي للسلطة, وتجميد اموال الضرايب, يعني كأن المفاوضات عملت النا اشي يا خي.

اه هيا الملعونة اسرائيل يا فايز .. اللي الواحد بيخاف من الاعيبها, لأنه مش من مصلحتها تصير مصالحة, ولازم تلعب لعبتها علشان تفشل كل جهودنا, بس اللي امطمني شويه انه المفاوضات فشلت, واسرائيل بتعمل في القدس والضفة اللي بدها اياه, والسلطة مش راضية عن هذا الأمر, والامريكان فشلوا في اقناع اسرائيل بوقف الاستيطان, واحسن رد على هذه السياسة الاسرائيلية هو انهاء الانقسام فورا, والبدء في اجراءات المصالحة, علشان كلنا كفلسطينيين سلطة وفصائل وشعب نتصدى للسياسة الاسرائيلية.

بالك يا عم ابو وفيق ممكن بهذه السهولة اسرائيل تستسلم وتقبل بالمصالحة, انا حاسس انها بتفحر النا عالسكت, وبتراهن على فشل المصالحة, بس هيا ما بدها تظهر في الصورة هالوقت, علشان ما تزعل مصر اللي بتدفع باتجاه المصالحة, هيا ممكن تضرب ضربتها لما تحس ان جماعتنا اتفقوا وبدهم يطبقوا المصالحة.

شوف يا خوي يا فايز, اذا كنا صادقين, ونوايانا سليمه, وحاسين بالمسؤوليه, لا اسرائيل ولا امريكا اللي اكبر منها, ولا حتى العالم كله بيقدر يفشل مصالحتنا, المهم انها تكون عندنا الارادة الكافية انا نتغلب على كل العقبات والمصاعب اللي بتواجه مصالحتنا, وكل واحد يتنازل شوية للتاني,  احنا اللي عملنا الانقسام, واحنا اللي لازم ننهيه, المصالحة مش مطلب بين فتح وحماس, وللا حكومة غزة وحكومة رام الله, المصالحة صارت مطلب جماهيري, كل الشعب الفلسطيني بده مصالحة, يا سيدي خلينا نؤجل خلافتنا شوية, لما نحرر بلادنا ونرجع ارضنا, ساعتها بنصفي حساباتنا مع بعضنا زي ما بدنا, واللي اله حق بياخده, بس هالوقت واعدائنا بيذبحوا فينا وبيسرقوا ارضنا, وبينهبوا خيراتنا, مش لازم  نلتفت لبعضنا, ونقاتل بعضنا, ونشوه بعضنا, والله هذه ما هيا وطنية, ولا فيها ادنى شعور بالمسؤولية, لازم تعرفوا يا عالم ان المصالحة خيار .. خيار .. خيااار شعبنا الفلسطيني.