خبر أمنيتي في العام الجديد

خالد صادق

× ايش اللي بيفرقع هذا, هما اليهود رجعوا للحرب تاني وللا ايش, استر يا رب, ولك يا حمزة وين أبوك خليه يشوف ايش اللي بيحصل وللا شوف عمك جمال.

× مالك يمه اسم الله عليكي, ما في حاجة, اليوم راس السنة الميلادية الجديدة وانطلاقة حركة فتح والناس بتحتفل, اللي بيطخ في الهوا واللي بيفرقع العاب, واللي  بيصرخ وبيهتف كله هايص .

× والله يمه يا جمال بطلنا نفرق بين الأيام, كلها شبه بعضها, سنة بتطوي ورا سنة وإحنا مش حاسين, وكله من أعمارنا, نفسي ربنا يطول في عمري لحد ماشوف أخوك يوسف وهو طالع من السجن, وأخذه في حضني قبل ما أموت, وافرح بيه, هذه أمنية حياتي يمه في العام الجديد.   

× انشالله بتشوفيه يا ست الكل وبتفرحي بيه وبأولاده كمان, فرجه قريب يمه, طول ما في عند المقاومة أسرى ما تخافي, وإذا كان اليوم وللا بكرة إسرائيل راح ترضخ لمطالبنا وتفرج عن كل الأسرى غصب عنهم, بس بدها شوية صبر يمه, وانشالله هذا العام يكون عام الإفراج عن الأسرى وتبييض السجون.   

× انشالله يمه من تمك لباب السما, آخر زيارة شفت أخوك فيها قبل ست أشهر, كان بيطمني وبيقولي انشالله راح نطلع يمه, فرجه قريب بس انتي ادعيلنا, وكان مستبشر ووجه بيضحك, الله يرضى عليه, والله ما ببطل دعا اله لا ليل ولا نهار انه ربنا يفك سجنه وسجن كل الأسرى معاه.

× هي ابنك أبو حمزة أجا, أبصر وين كاين, بشوفه مبسوط وبيضحك, تلاقيه عمله عملة وجاي يقولك عنها ما هو بيفوع زى الصغار اخويا وأنا عارفه

× اسمعتي يمه اسمعتي الفراقيع, كيف كان الصوت أكيد زي القنبلة, وتلاقيكي خفتي, أمانة ما هو صحيح, علشان تعرفي, ابنك معلم في طرقعة قنابل الصوت, أعلى صوت فيكي يا غزة صوت فرقيع أبو حمزة.  

× هه هه هايي, شوف أخوك أبو حمزة يا جمال, لساته عقله طايش مش راح يكبر أبدا, ابنه حمزة صار طوله ولساته بيعمل عمايل الصبيان, اكبر يمه , اكبر الله يرضى عليك, شوف كيف آخوك جمال عاقل خليك زيه, طول عمرك وانت شقي, وقلت لأبوك انجوزك بدري علشان تعقل, بس لساتك صغير عمرك ما راح تكبر. 

× بس بيضلوا غالي عليكي يمه, طول عمرك بتدلليه وبتنيميه في حضنك, وبتخافي عليه أكثر منا, لحد ما شاف دلاله علينا, وجوزتيه قبلنا كلنا, هذا أبو حمزة الغالي وللا ايييش.

× والله كلكم غاليين يمه يا جمال, بس أخوك أبو حمزة سجنوه اليهود الملاعين وهو لسه صغير أيام الانتفاضة وعذبوه علشان بيعزق عليهم حجار, وحكموه سنتين, ما صدقت يطلع من السجن كان مريض وصحته هفتانه, عالجته وغذيته وقعدت احنحن عليه لحد ما ردت صحته شوية, وزوجناه وجبلنا الغالي حمزة زينة الدار كلها.

× يعني مش مكفي دللتي أبوه يمه, كمان خليتي ابنه زينة الدار, والله ضيعتينا يمه بين حمزة وأبوه, ابسط يا عم هيك ماكل الجو انت وابنك, وإحنا راحت علينا, ماش بيقولوا في المثل اعز من الولد ولد الولد. 

× طيب بس انت قول بدي اتجوز وشوف إذا ما كان أخوك أبو حمزة وحبيبك من بكرة يجيبلك أحلى عروس, بس انت اشر يا جمال واحنا نقولك حاضر.

× والله ما بتقصر يا اخو يا أبو حمزة, بس أنا انشالله راح اتجوز أنا وأخوك يوسف مع بعضنا, لما ربنا يفك سجنه عن قريب انشالله, هذا عهد أخذته على نفسي, ولازم أوفي بعهدي. 

× وأنا والله لأعمل الكم أحلى عرس, وفرحتنا بتكون فرحتين, لاااا تلاته, فرحة بيك, وفرحة بيوسف, وفرحة بطلوعه من السجن, يعني بدها على الأقل أحلى عجل ينذبح للمعازيم يمه, وللا ايش رأيك.  

× أي هيا فيها راي, والله انشالله غير عجلين يا أبو حمزة, ونعزم كل القرايب والحبايب, انشاالله بيكون عام سعيد علينا وعلى الأمة الإسلامية, وافرح بإخوتك واطمئن عليهم قبل مأموت.

× راح تفرحي يمه .. راح تفرحي, خليكي واثقة في الله, وفي مقاومتنا, الصفقة جاية جاية انشالله, وبكره بتطردينا من حضنك, وبتضمي يوسف اله, يا بخته, والله حضنك دافي يمه, أحلى وأحن حضن في الدنيا, نيالك يا يوسف بكره بتاكل الجو منا وبتصير انت اللي عالحضن, واحنا إلنا الله .

× حضني بيسع الكم كلكم يا أولادي, بس ربنا يتمم فرحتنا ويطلعلنا يوسف بالسلامة, قولوا آمين, آمين يا رب.